U TIRRIMUOTU DI MESSINA
ca fu a lu millinovicientuottu
successi stu terribili misfattu
duoppu Natali lu iuornu vintuottu
lu tirrimuotu quantu dannu ha fattu
Missina nun esisti mancu puortu
pinzannu ssa matina niesciu mattu
di lu spavientu sugnu mienzu muortu.
Vi pregu d'ascutari ogni pirsuna
vi cuntu lu disastru di Missina
io preu a Cristu darimi furtuna
fari sta puisia cu menti fina
quannu ci pienzu la testa mi fuma
quannu arristaiu vivu ssa matina
Cristu di cielu scinniu impirsuna
distrussi Reggiu Calabria e Missina.
Ora vi cuntu di lu tirrimuotu
di lu mumentu ca principiatu
iu a ddu puntu era addurmisciutu
ntisi la scossa e maiu arrivigghiatu
di di la branta nterra aiu cadutu
scappu dda sutta tuttu spavintatu
e prestamenti minnaiu scappatu.
Cuomu arrivaiu vicinu la scala
vitti la scala ca nun 'esistia
vitti dda nterra lu tiettu e li trava
la cammarata chi nun si vidia
lu tirrimuotu già continuava
cadia massi vicinu di mia
li massi a scatta cori li passava
pregannu sempri a la Matri Maria.
Fu na matina veru sdisaggiusa
Cristu ni pustiau all'impruvisa
iuornu vintuottu fu veru visitusa
a li cincu e vinti fu l’ura precisa
chamammu a Cristu cu vuci piatusa
tutti scappammu scauzi e ncammisa
si vitti ca fu cosa priculusa
e stamu tutti cu l'arma suspisa.
Nessun commento:
Posta un commento